استيقظت يوما فوجدتني حزين جداً وليست لدي الرغبة للقيام بأي عمل
فأخذت أُفتش في ثنايا صدري لأعرف ما هو سبب حزنى
وقلبت صفحات عقلى الباطن حتى أعثر على مفتاح المشكلة
فقلت لنفسي ربما أنت حزين بسبب حادث مطروح والذي راح ضحيتة
العديد من أبناء هذا الوطن جراء السرعة الجنونية والتنظيم الخاطئ للمزلقان
ثم قلت لالالالالالا
ربما يكون السبب هو غلاء الأسعار والرحلة اليومية للبحث عن لقمة العيش
ثم أعاود الرد على نفسي لا فهذا الامر قد نكون تعودنا عليه
هل سبب حزنى هو اختفاء بنزين 80 من محطات الوقود
مما يضطر السائق للإنتظار نصف يومه للحصول على ما يريد
وهذا بالطبع ينعكس على لأن السائق تلقائياً سوف يطلب منى زيادة الأجرة
أصلها ناقصة
ثم قلت لا أنا ممكن أمشي وما اركبش
قد يكون سبب حزنى هو ارتفاع نسبة البطالة مما أدي للفساد وانتشار المخدرات بين الشباب
أكيد مش هو ده السبب
طب فكر كده يمكن السبب هو إحتكار الحديد وزيادة سعره يوم بعد يوم
وكله طبعاً في ميزان أموال العز
لالالالالالالالالالالالالا
انت حيرتني يا شيخ طب ايه بس اللى مزعلك
يمكن علشان البنت فلانة جارتنا المثقفة خريجة الجامعة
بنت عم فلان الراجل المحترم الغلبان
هيجي لها عريس بعد ما زاد عمرها عن 32 سنة
طب ده انت لازم تفرح انها خلاص هتتجوز دا غيرها فاته القطر ولم يأتى ابن الحلال لحد الان
فقلت صح عندك حق
انت تعرف يمكن يكون السبب في ايه.......؟
تزوير الانتخابات التكميلية لمجلس الشعب في الاسكندرية وكفر الشيخ
لالا ده عادي وبيحصل كتير الحكومة اتعودت على كده
يووووووووووووووه
طب بس ايه سبب الحزن ده والتكشيرة دي
يمكن علشان الشباب اللى غرق في البحر وهو طفشان من البلد دي
او يمكن علشان عمارة لوران اللي وقعت بسبب الفساد المحلى
او يمكن ...........................
لا بس خلاص انا عرفت السبب
السبب هو ان الزمالك اتغلب من الأهلى والجماعة الأهلوية فرحانين في
أكيد لأنهم انتصروا على عدوهم الأساسي ألا وهو الزمالك
وبكده اتحلت جميع مشاكلهم
صح كده
3 شرفني بتعليقك هنا:
فعلا يا اخى الناس بتفرح في بعضها وكأن كل مشاكلها اتحلت ومعدش غير ينتقموا من بعض في الكورة
عند حق يا علاء الشعب ده مليان تفاهه رغم المصايب اللى هو فيها بس برده فايق يتابع الأفلام والكوره ويفرح قوى لو فريقه كسب ويبقى عامل زى اللى ماتله ميت لو فريقه خسر ( شعب تافه)
ارجو زيارة مدونت مواطنون ضد الشعب للتعرف علي خطها الفكري وستج اننا نتفق في الكثير.
م/الحسيني لزومي
www.moatnondedelsh3ab.blogspot.com
إرسال تعليق